भाजप सोडणार अजितदादांची साथ

महाराष्ट्रातील सत्ताधारी आघाडीत म्हणजेच महायुतीमध्ये सर्व काही ठीक नाही. भाजप, शिवसेना आणि राष्ट्रवादी या महायुती या तीन पक्षांमध्ये तणाव वाढला आहे. लोकसभा निवडणुकीच्या निकालानंतर तिन्ही पक्ष नव्याने मोर्चेबांधणी करण्यात गुंतले आहेत. सर्वात वाईट परिस्थिती राष्ट्रवादीचे नेते अजित पवार यांची आहे. निवडणूक आयोग आणि सभापतींनी त्यांना ‘खरी राष्ट्रवादी’ बनवली. पण लोकसभा निवडणुकीत त्यांच्या पक्षाला चारपैकी फक्त एक जागा जिंकता आली. त्यांच्या पत्नी सुनेत्रा पवार यांचा बारामतीतून सुप्रिया सुळे यांच्याकडून पराभव झाला. त्यानंतर अजित पवार यांनी पत्नीला राज्यसभेवर पाठवले. याबाबत अनेक ज्येष्ठ नेतेही नाराज आहेत.
दरम्यान, राष्ट्रीय स्वयंसेवक संघाचे मुखपत्र ‘द ऑर्गनायझर’मध्ये भाजपचे विचारवंत रतन शारदा यांनी अजित पवार यांच्या पक्षासोबतच्या युतीबाबत प्रश्न उपस्थित केला आहे. त्यानंतर विधानसभा निवडणुकीत अजित पवार यांच्याकडून भाजपला फारसा फायदा अपेक्षित नसल्याची चर्चा रंगली आहे. त्यामुळे अजितदादा महायुतीतून बाहेर फेकले जाऊ शकतात. ते एकटेच लढले तर शरद पवारांची मते कमी होतील, असा भाजपमधील अनेकांचा समज आहे.
खरे तर अजित पवार यांनी भाजपच्या पाठिंब्यावर वेगळा पक्ष काढला होता. त्यानंतर भाजपने त्यांना उपमुख्यमंत्री केले तेव्हा पश्चिम महाराष्ट्रात 12 लोकसभा आणि विधानसभेच्या सुमारे 70 जागांवर पक्षाला फायदा होईल, अशी आशा होती. मात्र त्याचा फायदा भाजपला मिळाला नाही. नुकतीच दिल्लीत भाजपच्या महाराष्ट्र विभागाच्या कोअर कमिटीची बैठक झाली, त्यात अजित पवारांच्या उपयुक्ततेवर चर्चा झाली. युतीचे तीनही पक्ष एकत्र लढणार असल्याचे पक्षाकडून अधिकृतपणे सांगण्यात आले. मात्र भाजप आणि अजित पवार यांच्यात खडाजंगी सुरू झाल्याचे जाणकार सूत्रांचे म्हणणे आहे. अजित पवारांसोबत राजकारण केल्याने त्याचा विपरीत परिणाम झाल्याचे भाजपला वाटते. सहानुभूती मिळाल्याने शरद पवार मजबूत झाले आहेत.
दरम्यान, महाराष्ट्रातील सर्वात मोठे ओबीसी नेते छगन भुजबळ यांनी संपूर्ण देशात जात जनगणनेची मागणी सुरू केली आहे. भुजबळांच्या या मागणीला अजितदादांची फूस असल्याचे भाजप नेते सांगत आहेत. त्यामुळे आता अजितदादांची साथ सोडण्यावाचून दुसरा पर्याय नसल्याचे भाजप नेत्यांना वाटत आहे.